Gairan Land Maharashtra | खेडमध्ये बुलडोझरची धडक! व्यावसायिक मिळकतींवर मोठी कारवाई; खराबवाडीत अतिक्रमण हटाव सुरू
खेड तालुक्यातील खराबवाडी येथील गायरान जमिनीवरील अतिक्रमण हटविण्यासाठी महसूल प्रशासनाची मोठी कारवाई सुरू. खराबवाडीत 286 व्यावसायिक मिळकतींवर बुलडोझर, गोलेगावसह एकूण 373 मिळकतींचा समावेश
Mahavartalive
2:28 PM
महावार्ता लाईव्ह | पुणे जिल्ह्यातील खेड तालुक्यातील गोलेगाव आणि खराबवाडी येथील गायरान जमिनीवरील अतिक्रमण हटविण्यासाठी महसूल प्रशासनाने आज सकाळपासून खराबवाडीत मोठी कारवाई सुरू केली आहे. प्राथमिक टप्प्यात खराबवाडी येथील व्यावसायिक व वाणिज्यिक मिळकतींवर बुलडोझर चालविण्यात येत असून, या कारवाईमुळे परिसरात मोठी खळबळ उडाली आहे.
प्रशासनाने दिलेल्या माहितीनुसार, गोलेगाव आणि खराबवाडी मिळून एकूण 373 व्यावसायिक व वाणिज्यिक मिळकतींवर कारवाई करण्यात येणार आहे. यापैकी खराबवाडी येथील दोन एकर गायरान क्षेत्रात उभारण्यात आलेल्या 286 मिळकतींवर प्रथम टप्प्यात कारवाई सुरू करण्यात आली आहे.
जाहिरात
कारवाईदरम्यान तहसीलदार प्रशांत बेडसे, गटविकास अधिकारी विशाल शिंदे, महसूल विभागाचे अधिकारी, स्थानिक प्रशासन तसेच मोठा पोलीस बंदोबस्त तैनात करण्यात आला आहे. कोणताही अनुचित प्रकार घडू नये यासाठी संपूर्ण परिसरात कडक सुरक्षा व्यवस्था ठेवण्यात आली आहे.
न्यायालयाच्या आदेशानुसार कारवाई
महसूल प्रशासनाने स्पष्ट केले की, गोलेगाव आणि खराबवाडी येथील गायरान जमिनीवरील अतिक्रमणाबाबत उच्च न्यायालयात सुरू असलेल्या प्रकरणात न्यायालयाने संबंधित जमीन अतिक्रमणमुक्त करण्याचे आदेश दिले आहेत. याशिवाय सर्वोच्च न्यायालयाने राज्यभरातील गायरान जमिनीवरील अतिक्रमणे हटविण्याबाबत दिलेल्या निर्देशांनुसार ही कारवाई करण्यात येत आहे.
त्यामुळे न्यायालयीन आदेशांची अंमलबजावणी करत महसूल प्रशासनाने अतिक्रमण हटविण्याची प्रक्रिया सुरू केली असून, सध्या व्यावसायिक आणि वाणिज्यिक वापरातील मिळकतींवर लक्ष केंद्रित करण्यात आले आहे.
व्यापाऱ्यांमध्ये चिंता
या कारवाईत अनेक दुकाने, गाळे आणि व्यावसायिक आस्थापना जमीनदोस्त करण्यात येत असल्याने स्थानिक व्यापारी आणि व्यावसायिकांमध्ये चिंता व्यक्त होत आहे. अनेकांचे व्यवसाय बंद पडण्याची शक्यता असून, यामुळे रोजगाराचा प्रश्न निर्माण होण्याची भीती स्थानिकांकडून व्यक्त केली जात आहे.
प्रशासनाची भूमिका
महसूल प्रशासनाने नागरिकांना शांतता राखण्याचे आवाहन केले असून, न्यायालयीन आदेशांचे पालन करण्यासाठी ही कारवाई केली जात असल्याचे सांगितले आहे. पुढील काही दिवसांत उर्वरित अतिक्रमणांवरही टप्प्याटप्प्याने कारवाई होण्याची शक्यता आहे.
