Pune Division Local Body Election | पुणे विभाग स्थानिक स्वराज्य संस्था मतदारसंघात शिवसेनेचे रणजीत जरे यांची एन्ट्री; उमेदवारी अर्ज दाखल

महावार्ता लाईव्ह | राज्यातील विधान परिषद स्थानिक स्वराज्य संस्था निवडणुकीसाठी महायुतीमधील जागावाटपाचा तिढा अद्याप कायम असतानाच पुणे विभाग स्थानिक स्वराज्य संस्था मतदारसंघातून निवडणूक लढविण्यासाठी पुणे जिल्ह्यातील खेड तालुक्यातील चाकण नगरपरिषदेचे बांधकाम सभापती तथा शिंदे गटाच्या शिवसेनेचे नगरसेवक रणजीत सखाराम जरे यांनी उमेदवारी अर्ज दाखल केला आहे. त्यांच्या अचानक झालेल्या उमेदवारीमुळे पुणे जिल्ह्याच्या राजकीय वर्तुळात खळबळ उडाली असून आगामी निवडणुकीत रंगत वाढण्याची शक्यता व्यक्त केली जात आहे.

जरे यांनी सोमवार (दि. १) रोजी पुणे जिल्हाधिकारी कार्यालयात प्रभारी जिल्हाधिकारी तथा जिल्हा निवडणूक अधिकारी गजानन पाटील यांच्याकडे आपला उमेदवारी अर्ज सादर केला. विशेष म्हणजे, उमेदवारी अर्ज दाखल करताना कोणतेही शक्तिप्रदर्शन न करता त्यांनी पक्षाच्या प्रमुख पदाधिकाऱ्यांच्या उपस्थितीत अर्ज दाखल करण्यास प्राधान्य दिले.

अचानक उमेदवारीमुळे राजकीय चर्चांना वेग

पुणे विभाग स्थानिक स्वराज्य संस्था मतदारसंघाच्या निवडणुकीबाबत महायुतीतील पक्षांमध्ये अद्याप अंतिम निर्णय झालेला नसताना रणजीत जरे यांनी अर्ज दाखल केल्याने विविध राजकीय चर्चांना वेग आला आहे. महायुतीच्या अधिकृत उमेदवारीबाबत संभ्रम असतानाच जरे यांच्या दावेदारीमुळे स्थानिक स्वराज्य संस्थांमधील राजकीय समीकरणांवर परिणाम होण्याची शक्यता वर्तविली जात आहे.

खेड तालुक्यासह चाकण परिसरात सक्रिय असलेले रणजीत जरे हे नगरपरिषदेतील बांधकाम सभापती म्हणून कार्यरत असून शिवसेना शिंदे गटातील स्थानिक नेतृत्वामध्ये त्यांची ओळख आहे. त्यामुळे त्यांच्या उमेदवारीकडे राजकीय निरीक्षकांचे लक्ष लागले आहे.

पक्षाच्या प्रमुख पदाधिकाऱ्यांची उपस्थिती

उमेदवारी अर्ज दाखल करताना शिवसेनेचे जिल्हाप्रमुख तथा खेड पंचायत समितीचे सभापती भगवान पोखरकर, चाकण नगरपरिषदेतील शिवसेनेचे गटनेते, नगरसेवक तथा महाराष्ट्र प्रदूषण मंडळाचे सदस्य नितीन गोरे, उपजिल्हाप्रमुख प्रकाश वाडेकर, चाकण शहरप्रमुख महेश शेवकरी यांच्यासह अनेक पदाधिकारी उपस्थित होते.

तसेच नगरसेवक प्रीतम परदेशी, राहुल कांडगे, शशिकांत जाधव, अनिल लोहकरे, प्रेम जगताप, विशाल नायकवडी, मंगेश कांडगे, चाकण शहर युवासेना प्रमुख अभिजित जाधव, सुनील शेवकरी यांच्यासह शिवसेनेचे कार्यकर्ते आणि पदाधिकारी मोठ्या संख्येने उपस्थित होते.

निवडणुकीत वाढणार रंगत?

महायुतीतील जागावाटप आणि उमेदवार निश्चितीचा प्रश्न अद्याप निकाली निघालेला नसताना रणजीत जरे यांच्या उमेदवारीने निवडणुकीचे चित्र अधिकच रंजक बनले आहे. पुढील काही दिवसांत महायुतीकडून अधिकृत उमेदवाराची घोषणा झाल्यानंतर या मतदारसंघातील राजकीय समीकरणे स्पष्ट होणार असली तरी जरे यांच्या दावेदारीमुळे पुणे विभागातील विधान परिषद निवडणुकीत उत्सुकता वाढली आहे.