Bank News | राजगुरूनगर सहकारी बँकेच्या अध्यक्षपदाची माळ कोणाच्या गळ्यात पडणार ?

महावार्ता लाईव्ह | पुणे जिल्ह्याच्या सहकार क्षेत्रातील अग्रेसर व प्रतिथयश संस्था म्हणून ओळख असलेल्या राजगुरूनगर सहकारी बँकेच्या अध्यक्षपदाच्या निवडणुकीची चर्चा सध्या जोरात रंगली आहे. विद्यमान अध्यक्ष दिनेश ओसवाल व उपाध्यक्ष अविनाश कहाणे यांनी राजीनामा दिल्यानंतर आता पुढील अध्यक्ष व उपाध्यक्ष कोण होणार ? याकडे उत्तर पुणे जिल्ह्यातील संपूर्ण तालुक्याचे लक्ष लागले आहे.बँकेच्या यशस्वी कारभारामुळे आणि ग्राहकांमधील विश्वासामुळे ही निवडणूक केवळ बँकेच्या भवितव्यासाठीच नव्हे, तर स्थानिक राजकारण आणि सहकार क्षेत्रासाठीही महत्त्वाची मानली जात आहे. अध्यक्षपदाची माळ कोणाच्या गळ्यात पडणार, याबाबत उत्सुकता शिगेला पोहोचली आहे.

राजगुरूनगर सहकारी बँक ही पुणे जिल्ह्यातील खेड तालुक्यातील एक प्रमुख सहकारी बँक आहे. स्थापनेपासूनच ही बँक शेतकरी, छोटे व्यावसायिक आणि सामान्य नागरिकांच्या आर्थिक गरजा पूर्ण करण्यासाठी कटिबद्ध आहे. बँकेने आपल्या पारदर्शक कारभार, ग्राहककेंद्रित धोरणे आणि आधुनिक बँकिंग सेवांमुळे विशेष स्थान निर्माण केले आहे.सध्या बँकेच्या अनेक शाखा पुणे जिल्ह्यात कार्यरत असून, ती डिजिटल बँकिंगच्या क्षेत्रातही आघाडीवर आहे. बँकेच्या आर्थिक स्थैर्यामुळे आणि सभासदांच्या विश्वासामुळे अध्यक्ष व उपाध्यक्षपदाची निवडणूक अत्यंत प्रतिष्ठेची मानली जाते.

२०२२ मध्ये बॅंकची पंचवार्षिक निवडणूक भीमाशंकर सहकार पॅनल व राजगुरूनगर सहकार परिवर्तन पॅनल यामध्ये जोरदार लढत झाली होती.१६ जागा पैकी १२ जागा जिंकत भीमाशंकर परिवर्तन पॅनलने दणदणीत विजय मिळवला होता. पहिल्यांदा राहुल तांबे यांच्यानंतर दिनेश ओसवाल यांनी अध्यक्षपदाची धुरा सांभाळली.सध्या राजगुरूनगर सहकारी बँकेच्या अध्यक्षपदाचे निवडणुकीसाठी तयारी जोरात असल्याची चर्चा सुरू आहे. सहकारी बँकांच्या निवडणुका या स्थानिक राजकारण आणि सहकार क्षेत्रातील प्रभावशाली व्यक्तींच्या नेतृत्वाची कसोटी पाहणाऱ्या असतात.बँकेच्या अध्यक्षपदाच्या या निवडणुकीत सहभागी होण्यासाठी अनेक दिग्गज नेते आणि सहकार क्षेत्रातील अनुभवी व्यक्ती इच्छुक असल्याची माहिती आहे. 

यापूर्वी बँकेच्या संचालक मंडळात काम केलेले काही अनुभवी संचालक अध्यक्ष होणार का नवख्या संचालकाच्या गळ्यात अध्यक्षपदाची माळ पडणार याकडे सर्वांचे लक्ष लागले आहे. भीमाशंकर सहकार पॅनलप्रमुख व जेष्ठ अनुभवी संचालक किरण आहेर व सलग दोन पंचवार्षिक निवडणूक विजयी झालेले संचालक सागर पाटोळे, अरुण थिगळे यांच्या नावाची चर्चा तालुक्यात सुरु आहे.

राजगुरूनगर सहकारी बँकेच्या अध्यक्षपदाची निवडणूक ही केवळ बँकेच्या कारभारापुरती मर्यादित नाही. खेड तालुक्यातील राजकीय समीकरणे,सहकार क्षेत्रातील प्रभाव आणि स्थानिक पातळीवरील नेतृत्वाची दिशा ठरवण्यात या निवडणुकीची महत्त्वाची भूमिका आहे.नवीन अध्यक्षाला बँकेच्या आर्थिक स्थैर्याला पुढे नेणे,ग्राहकांच्या अपेक्षा पूर्ण करणे आणि डिजिटल युगात बँकेची स्पर्धात्मकता टिकवणे यासारखी आव्हाने पेलावी लागणार आहेत.

सध्या स्थितीत भीमाशंकर सहकार पॅनलकडे १६ पैकी १२ संचालक आहेत. राजगुरूनगर सहकार परिवर्तन पॅनलकडे ४ जागा आहे. भीमाशंकर पॅनलकडे जास्तीचे संख्याबळ असल्याने अध्यक्ष याच गटाचा बिनविरोध होईल अशी सध्या स्थिती आहे. परिवर्तन गट संख्याबळ नसल्याने अध्यक्ष पदापासून सध्यातरी वंचित राहणार असे जेष्ठ सभासद यांचे म्हणाने आहे.

सहकार क्षेत्रातील तज्ज्ञांच्या मते, राजगुरूनगर सहकारी बँकेच्या अध्यक्षपदासाठी निवडला जाणारा उमेदवार हा बँकिंग क्षेत्रातील अनुभव,सहकारी तत्त्वांशी बांधिलकी आणि आधुनिक तंत्रज्ञानाची जाण असलेला असावा. बँकेच्या विस्तारासाठी आणि ग्राहक सेवांच्या उन्नतीसाठी नव्या अध्यक्षाला धोरणात्मक निर्णय घ्यावे लागणार आहेत.

राजगुरूनगर सहकारी बँकेच्या अध्यक्षपदाची निवडणूक ही पुणे जिल्ह्यातील सहकार क्षेत्रातील एक महत्त्वाचा टप्पा ठरणार आहे. ही निवडणूक बँकेच्या भविष्याबरोबरच स्थानिक राजकारण आणि सहकारी चळवळीच्या दिशेला आकार देणारी ठरेल. अध्यक्षपदाची माळ कोणाच्या गळ्यात पडणार, याबाबतचा सस्पेन्स लवकरच उलगडेल. तोपर्यंत, निवडणुकीच्या या थरारक घडामोडींकडे सर्वांचे लक्ष लागले आहे.