Crime Branch action | पिंपरी -चिंचवड: गुन्हे शाखा युनिट ३ ची धडाकेबाज कारवाई; २ लाखांहून अधिक किमतीची अवैध विदेशी दारू जप्त, तिघांना अट

महावार्ता लाईव्ह | अवैध मद्य विक्री आणि तस्करीला चाप बसवण्यासाठी पिंपरी-चिंचवड पोलीस आयुक्तालयाने सातत्याने कारवाया सुरू ठेवल्या आहेत. याच अभियानांतर्गत गुन्हे शाखा युनिट ३ च्या पथकाने चऱ्होली परिसरात मोठी यशस्वी कारवाई करत सुमारे २ लाख ४८० रुपयांची  विनापरवाना विदेशी दारू आणि संबंधित मुद्देमाल जप्त केला आहे. या प्रकरणात तिघा आरोपींना अटक करण्यात आली असून, त्यातील दोघे गुजरात राज्यातील असल्याने तस्करीचे आंतरराज्य नेटवर्क असण्याची शक्यता वर्तवली जात आहे.

घटनेची नेमकी माहिती

१९ मार्च २०२६ रोजी गुन्हे शाखा युनिट ३ चे पथक चऱ्होली परिसरात पेट्रोलिंग करत असताना गोपनीय माहितीदाराकडून खबर मिळाली की, दाभाडे सरकार चौक येथे अवैध विदेशी दारूची मोठ्या प्रमाणात साठवणूक आणि विक्री सुरू आहे. माहितीची पडताळणी करून पथकाने तात्काळ या ठिकाणी छापा टाकला आणि मोठ्या प्रमाणात अवैध विदेशी दारू हस्तगत केली.

अटक केलेले आरोपी

पोलिसांनी या कारवाईत खालील तिघांना अटक केली आहे:  रामप्रसाद साहेबराव साळुंखे (वय ३३, रा. चऱ्होली खुर्द, ता. खेड, जि. पुणे), तिलक हेमंत पटेल (वय २१, रा. वापी, जि. वलसाड, गुजरात), अनिल राम सुरत यादव (वय २४, रा. वापी, गुजरात) अटकेतील दोन आरोपी गुजरातच्या वापी येथील असल्याने ही तस्करी गुजरात ते महाराष्ट्र असा आंतरराज्यीय रॅकेटचा भाग असू शकतो, असे पोलिसांचे मत आहे. या प्रकरणाचा सखोल तपास सुरू असून, मद्य पुरवठादार आणि वितरकांच्या मोठ्या साखळीचा शोध घेतला जात आहे.

कारवाईचे नेतृत्व

ही यशस्वी कारवाई पिंपरी-चिंचवड गुन्हे शाखा युनिट ३ चे पोलीस निरीक्षक संतोष कसबे यांच्या मार्गदर्शनाखाली पार पडली. पथकात उपनिरीक्षक जावळे, पोलीस हवालदार श्रीधन इचके, सोमनाथ बोराडे, सूर्यवंशी, तसेच पोलीस शिपाई शशिकांत नांगरे, समीर काळे, निखिल फापाळे आणि इघारे यांचा समावेश होता.

जप्त केलेला मुद्देमाल आणि आरोपी पुढील तपास व कायदेशीर कार्यवाहीसाठी दिघी पोलीस ठाण्याच्या ताब्यात देण्यात आले आहेत. दिघी पोलीस ठाण्याचे तपास अधिकारी या तस्करी रॅकेटमागील इतर आरोपी आणि पुरवठादारांचा शोध घेत आहेत. पिंपरी-चिंचवड पोलिस आयुक्तालयाकडून अवैध धंद्यांविरोधात अशीच कठोर कारवाई सुरू राहणार असल्याचे संकेत मिळत आहेत.