Khed | भाजप खेड ग्रामीण तालुका अध्यक्षपदी सुनील देवकर यांची एकमताने निवड

महावार्ता लाईव्ह | खेड-आळंदी विधानसभा मतदारसंघातील  भाजपच्या खेड ग्रामीण मंडलच्या तालुका अध्यक्षपदी सुनील दत्तात्रय देवकर यांची निवड झाली आहे. पक्षाच्या वरिष्ठ नेत्यांनी आणि कार्यकर्त्यांनी एकमताने त्यांच्या नावावर शिक्कामोर्तब केले. या निवडीसाठी मागील आठवड्यात पक्षातर्फे इच्छुक उमेदवारांच्या मुलाखती घेण्यात आल्या होत्या. यावेळी प्रमुख पदाधिकारी आणि कार्यकर्त्यांची मते जाणून घेऊन चर्चा करण्यात आली. या निवड प्रक्रियेत प्रदेश अध्यक्ष चंद्रशेखर बावनकुळे, कार्यकारी अध्यक्ष रवींद्र चव्हाण, जिल्ह्याचे संपर्क मंत्री चंद्रकांतदादा पाटील, प्रदेश सरचिटणीस राजेश पांडे, प्रदेश उपाध्यक्ष बाळाभाऊ भेगडे, जिल्हाध्यक्ष शरद बुट्टे पाटील, जिल्हा सरचिटणीस संजय रौंधळ, जिल्हा सहकार आघाडीचे अध्यक्ष चंद्रशेखर शेटे आणि जिल्ह्याच्या कोर कमिटीने सुनील देवकर यांच्या नावाला पाठिंबा दर्शवला. या सर्वांनी एकमताने देवकर यांच्या नेतृत्वावर विश्वास व्यक्त केला.

निवड जाहीर

वासुली फाटा येथील सुनील देवकर यांच्या कार्यालयात जिल्हाध्यक्ष शरद बुट्टे पाटील यांनी प्रदेशच्या सूचनेनुसार त्यांची निवड जाहीर केली. यावेळी खरेदी-विक्री संघाचे उपाध्यक्ष दत्तात्रय टेमगिरे, युवा मोर्चाचे जिल्हा उपाध्यक्ष काळुराम पिंजन, आंबेठाणचे माजी सरपंच दत्तात्रय मांडेकर, आसखेड सोसायटीचे माजी चेअरमन बाळासाहेब लिंभोरे, अमोल राऊत, रोहिदास मांडेकर, शिवाजी कावरे, निलेश पानमंद, नवनाथ पानमंद, दत्ता पानमंद, नवनाथ देवकर, रोहिदास जाधव, सागर बधाले, सोमनाथ बांगर, संजय देवकर, राजाराम देवकर, शरद निखाडे यांच्यासह अनेक कार्यकर्ते उपस्थित होते.

नव्या मंडल रचनेत खेड ग्रामीण मंडल सर्वात मोठे

खेड-आळंदी विधानसभा मतदारसंघात भाजपने नव्याने चार मंडलांची रचना करण्यात आली आहे. यामध्ये आळंदी देवाची, चाकण, राजगुरुनगर आणि खेड ग्रामीण या मंडलांचा समावेश आहे. यापैकी खेड ग्रामीण मंडल हे सर्वात मोठे मंडल आहे. या मंडलात पिंपरी-पाईट, नायफड-वाशेरे आणि वाडा-कडूस या तीन जिल्हा परिषद गटांचा समावेश असून, एकूण १३३ बूथ आहेत. ही मोठी रचना आणि व्यापक क्षेत्रामुळे खेड ग्रामीण मंडल मतदारसंघात महत्त्वाची भूमिका बजावणार आहे.

सुनील देवकर यांच्यावर मोठी जबाबदारी

पक्षाच्या वरिष्ठ नेत्यांनी त्यांच्या नेतृत्वावर दाखवलेला विश्वास आणि कार्यकर्त्यांचा पाठिंबा यामुळे त्यांच्यावर मोठी जबाबदारी आली आहे. खेड-आळंदी मतदारसंघातील पक्षाचे बूथस्तरीय काम मजबूत करणे, कार्यकर्त्यांमध्ये समन्वय साधणे आणि स्थानिक प्रश्नांना प्रभावीपणे हाताळणे ही त्यांच्यासमोरील प्रमुख आव्हाने असतील.

राजकीय प्रवास

सुनील देवकर यांनी यापूर्वी खेड तालुका भारतीय जनता पार्टीमध्ये उपाध्यक्ष म्हणून कार्य केले आहे. तालुक्यातील सामाजिक कार्यात त्यांचा नेहमीच अग्रभागी सहभाग राहिला आहे. त्यांच्या नेतृत्वाखाली खेड ग्रामीण मंडलात पक्ष संघटना अधिक मजबूत होईल, असा विश्वास पक्षाच्या पदाधिकाऱ्यांनी व्यक्त केला आहे.

पक्ष कार्यकर्त्यांमध्ये उत्साह

देवकर यांच्या निवडीने खेड तालुक्यात भाजपच्या कार्यकर्त्यांमध्ये उत्साहाचे वातावरण आहे. नव्या मंडल रचनेसह सुनील देवकर यांच्या नेतृत्वाखाली पक्षाच्या स्थानिक पातळीवरील कामाला गती मिळेल, असा विश्वास कार्यकर्त्यांनी व्यक्त केला. येत्या काळात खेड-आळंदी मतदारसंघात पक्षाची ताकद वाढवण्यासाठी खेड ग्रामीण मंडल महत्त्वाची भूमिका बजावेल.

खेड - आळंदी मतदारसंघ 

खेड-आळंदी मतदारसंघ हा राजकीयदृष्ट्या संवेदनशील आणि महत्त्वाचा मानला जातो. नव्या मंडल रचनेमुळे भाजपाची स्थानिक पातळीवरील रचना अधिक मजबूत झाली आहे. खेड ग्रामीण मंडलच्या १३३ बूथमुळे या भागातील मतदारांशी थेट संपर्क साधण्याची संधी पक्षाला मिळणार आहे. सुनील देवकर यांच्या नेतृत्वाखाली पक्ष येथील स्थानिक प्रश्नांना प्राधान्य देऊन मतदारसंघात आपली पकड मजबूत करण्याचा प्रयत्न करेल. या निवडीबद्दल पक्षाच्या वरिष्ठ नेत्यांनी सुनील देवकर यांचे अभिनंदन केले असून, त्यांना पुढील वाटचालीसाठी शुभेच्छा दिल्या आहेत. खेड ग्रामीण मंडलच्या माध्यमातून पक्षाच्या कार्याला नवे बळ मिळेल, असा विश्वास सर्व स्तरांतून व्यक्त होत आहे.

नवनिर्वाचित अध्यक्ष सुनील देवकर यांनी सांगितले की, केंद्र आणि राज्यात भारतीय जनता पक्षाचे सरकार असल्याने संघटना बांधणीबरोबरच ग्रामीण भागातील जनतेचे प्रश्न सोडवण्यासाठी पक्षाच्या विस्तारावर विशेष लक्ष दिले जाईल. त्यांनी पक्षाच्या कार्यकर्त्यांना एकजुटीने काम करण्याचे आवाहन केले.