Breking News | चाकणमध्ये क्रूर घटना: हिंस्र भटक्या कुत्र्यांच्या हल्ल्यात महिलेचा मृत्यू; सीसीटीव्हीमध्ये दिसला भयावह प्रकार

महावार्ता लाईव्ह : पुणे-नाशिक महामार्गाच्या लगत असलेल्या आंबेठाण चौकाजवळील उड्डाणपुल परिसरात सोमवारी एका महिलेचा विवस्त्र आणि शरीराचे लचके तोडलेला मृतदेह सापडल्याने खळबळ उडाली आहे. ही महिला भटक्या कुत्र्यांच्या क्रूर हल्ल्यात ठार झाल्याची धक्कादायक माहिती समोर आली आहे. घटनास्थळावरील सीसीटीव्ही फुटेज पाहून पोलिसांसह स्थानिक नागरिकांनाही विश्वास बसू शकला नाही.

मृत महिलेचे नाव शोभा विजय वाघमारे (वय ३२) असे आहे. ती सध्या चाकण येथे राहत होती, तर तिचे मूळ गाव देगलूर, जिल्हा नांदेड आहे. माहितीनुसार, हिंस्र भटक्या कुत्र्यांच्या कळपाने तिच्यावर हल्ला केला. हल्ल्यादरम्यान तिच्या शरीराचे लचके तोडले गेले आणि मोठ्या प्रमाणात रक्तस्राव होऊन तिचा मृत्यू झाला. घटना मंगळवारी सकाळी उघडकीस आली, जेव्हा स्थानिकांनी मृतदेह पाहून पोलिसांना कळवले.

सीसीटीव्ही फुटेजमध्ये भयावह दृश्य

घटनेची माहिती मिळताच चाकण पोलिस ठाण्याचे पथक घटनास्थळी दाखल झाले. परिसरातील दुकानांमधील सीसीटीव्ही कॅमेऱ्यांची तपासणी केली असता, एका दुकानासमोरील कॅमेऱ्यातील दृश्याने सर्वांनाच हादरवून टाकले. फुटेजमध्ये सहा -सात भटक्या कुत्रे महिलेच्या मृतदेहावर तुटून पडलेले आणि तिच्या अंगाचे लचके तोडत असलेले दिसत आहे. हे दृश्य इतके भयानक होते की, पाहणाऱ्यांच्या पायाखालची जमीन सरकली. "आपण पाहतोय ते खरे आहे का?" असा प्रश्न सर्वांच्या मनात निर्माण झाला.

पोलिसांचा तपास सुरू

चाकण पोलिसांनी घटनेचा पंचनामा केला असून, मृतदेह शवविच्छेदनासाठी पाठवला आहे. प्राथमिक तपासात भटक्या कुत्र्यांच्या हल्ल्याने मृत्यू झाल्याचे स्पष्ट झाले आहे. महिलेच्या ओळखीची पुष्टी तिच्या कुटुंबीयांनी केली. पोलिसांनी परिसरातील इतर सीसीटीव्ही फुटेज तपासण्यास सुरुवात केली असून, महिलेच्या मृत्यूपूर्वी काय घडले याचा शोध घेत आहेत. तसेच, या भागातील भटक्या कुत्र्यांची संख्या आणि त्यांच्यावरील नियंत्रणाबाबत प्रश्न उपस्थित होत आहेत.

स्थानिकांची संताप व्यक्त; भटक्या कुत्र्यांवर कारवाईची मागणी

या घटनेने चाकण परिसरात भीतीचे वातावरण पसरले आहे. स्थानिक नागरिकांनी भटक्या कुत्र्यांची संख्या वाढल्याने असुरक्षितता वाढल्याची तक्रार केली आहे. "महिला एकटीच असतील तर काय होईल? आज एका महिलेला आपला प्राण गमवावा लागला आहे. पुढील काळात हिंस्र प्राण्यांमुळे रस्त्यावर चालणेही धोकादायक झाले आहे," अशा भावना व्यक्त होत आहेत. स्थानिकांनी तातडीने भटक्या कुत्र्यांवर कारवाई करण्याची आणि पिंजऱ्यात टाकण्याची मागणी केली आहे.

या घटनेने पुणे जिल्ह्यातील भटक्या कुत्र्यांच्या वाढत्या समस्येकडे पुन्हा एकदा लक्ष वेधले आहे. शोभा वाघमारे यांच्या निधनाने कुटुंबीय दुःखात बुडाले असून, परिसरात शोककळा पसरली आहे. पोलिसांनी प्रकरणाचा सखोल तपास सुरू केला असून, लवकरच अधिक माहिती समोर येण्याची शक्यता आहे.